هي من اقدم و اعرق مدن و مراكز مصر و هي من مراكز كفر الشيخ و يرجع اسمها الي الحضارة الفرعونية و كان وقتها اسمها بيلاق و تطور الاسم الي ان اصبح بيلا في عهد البطالمه
بيلا من المراكز القديمه اللي بتشتهر بالزراعة و هي من المراكز القليله جدا اللي لم يكن فيها اقطاعي او مارس اي اقطاعي مع اهلها السخره فترة المالكيه نهائي
و ذلك لانها ابيه ترفض القمع او القهر
بيلا تعتبر من اهم معاقل حزب الوفد القديم وفد سعد باشا زغلول و من بعده فؤاد سراج الدين فهي مدينه سياسية من الدرجة الاولي تخيل ان الحزب الوطني في عز جبروته كان صعب جداً ياخد مقعد من بيلا
حتي في انتخابات 2010 اللي كانت السبب في الاطاحة بالحزب الوطني
بيلا وقتها حرقت صناديق الانتخابات و رفضت اعلان النتيجة وقتها و كانت الدائرة الوحيده اللي رفضت هذه الانتخابات بالفعل و لم يكن لبيلا مقاعد في انتخابات 2010 لو اعتبرنا ان سبب ثوره 25 يناير هي انتفاضة ضد تزوير انتخابات مجلس الشعب وقتها يبقي بيلا هي الشراره الاولي فعلاً
حتي في سنه 77 و بعد الزيارة المعروفه لرئيس السادات الي اسرائيل
توكب مع هذه الزيارة وجود خلافات ثائريه بين عائلتين في بيلا و تدخل وقتها بعض البلطجية و فرض اتاوت علي اهالي بيلا و كان فيه صمت من الشرطة وقتها
و ده خلا اهالي بيلا تقوم بثوره كبيرة و تم حرق مركز الشرطة و محطه القطار و المحكمة..
المحكمة اللي تعتبر من اقدم محاكم مصر و اعرقها و عشان كده تصدرت الصحف العالمية خبر حرق المحكمة و تعتبر دي تاني محكمة يتم حرقها بعد محكمة نيويورك
طبعاً وقتها كان فيه قطيعه عربية للسادات و ده خلا بعض الصحف و الاذاعات العربية تقول ان الثورة سببها رفض السلام مع اسرائيل
و ده ممكن يكون سبب من ضمن اسباب الثورة غضب اهل بيلا علي الزيارة
وقتها ظهر السادات في خطاب شهير في مجلس الشعب و وضح وقتها ان الثورة اللي في بيلا لاسباب اخري و هي خلافات بين عائلات…
بيلا برغم انها مدينة لكن الي حد كبير لسه متمسكه بالعادات الريفية الاصيله صعب جداً تلاقي بلطجية او تجار مخدرات او عنف لانها الي حد كبير لسه فيها كبير لسه فيها احترام للكبير لسه فيها كبير العائلة
لحد الان لازم تبوس ايد عمك او خالك
بتقول لعمك او خالك يا ابا فلان الكبير في مقام الاب و له كل حقوق و واجبات الاب
لو فيه دفنه هتلاقي ماشي خلف الجثمان بالاف اه والله بالاف مهما كان منصبه كل البلد بتطلع خلف اي جنازه و كل البلد لازم تقوم بالواجب المادي ايضا
صعب جداً تلاقي حد محتاج في بيلا فيها نظام تكافلي و عقد غير مكتوب كل الناس بتخدم بعض بصوره مرتبه و مميزه للغاية
بدون ترتيب فيه شبكه تكافل اجتماعي منظمه حتي بعد وجود السوشيال ميديا هتلاقي جروبات كتير لاهل الخير لجمع تبرعات او تكافل اجتماعي فيما بينهم
فيه ارتباط وثيق بصورة غريبة صعب تلاقيها في اي مدينة او مركز بين بيلا و بين القري التابعة ليها الحوه و عثمان و الجرايده و منشيه الجرايده و ابشان و ابو بدوي
كلهم عارفين بعض فيه علاقات نسب و اخوه
في الغربة صعب واحد من بيلا يسافر و مايشتغلش في الغربة كلهم ايد واحدة و ضهر و سند بخلاف ما يشيع عن المصريين في الغربة
طبعاً بيلا تشتهر بمقام البيلي ابو غنام و ده له معزه و حب في قلوب كل بيلا بس بدون صخب او نذور او رجوع المطلقة او جلب الحبيب 😂
هو حب صوفي لشيخ ولي له حب و تقدير فقط
من مشاهير بيلا
ابو العنين شعيشع و الملحن محمد الموجي و الشاعر عبد السلام امين و فؤاد سراج الدين وزير داخلية
و حافظ بدوي رئيس مجلس الشعب السابق
و ابراهيم المعلم نائب رئيس النادي الأهلي السابق و الممثل الراحل مصطفى متولي و حسام غالي لاعب الاهلي
و طبعاً غيرهم كتييييير
